අලෙවිකරණය යනු කලාවකි.එමෙන්ම එය විද්‍යාවකි.සෑම විටම අලෙවිකරණය නිර්මාණශීලීත්වයෙන් පිරී ඇති බවත් විශ්ලේෂණ අනුසාරයෙන් වන විද්‍යාත්මක ක්‍රම මගින් එය නිති විමසීමකට ලක්වන බවත් සඳහන් වේ.
ඩිජිටල් අලෙවිකරණය යනු නිෂ්පාදන සහ සේවා ප්‍රවර්ධනය කිරීම සහ විකිණීම සඳහා වෙබ් අඩවි, යෙදුම්(apps),ජංගම උපාංග, සමාජ මාධ්‍ය, සෙවුම් යන්ත්‍ර සහ වෙනත් ඩිජිටල් මාධ්‍යයන් භාවිත කිරීමයි.
ඇතැම් රටවල්වල ඩිජිටල් අලෙවිකරණය “අන්තර්ජාල අලෙවිකරණය” සහ “ වෙබ් අඩවි අලෙවිකරණය” ලෙස හැඳින්වේ.පසුව ඩිජිටල් අලෙවිකරණය යන යෙදුම කාලයත් සමඟ ජනප්‍රිය වී ඇත.
ඩිජිටල් අලෙවිකරණය වනාහි එතරම් දීර්ඝ ඉතිහාසයක් නොමැති විශය ක්ෂේත්‍රයකි.එබැවින් මේ පිළිබඳ ඉදිරිපත් වී ඇති නිර්වචන ඉතා අල්පය.
Business dictionary ඩිජිටල් අලෙවිකරණය පිළිබඳ මෙසේ ඉදිරිපත් කර ඇත.
“ඩිජිටල් අලෙවිකරණය යනු පාරිභෝගිකයා කරා ළඟාවීමට සහ ඔවුන්ට මග පෙන්වීම සඳහා ඩිජිටල් තාක්ෂණය භාවිත කරමින් ඉලක්කගත,මැනිය හැකි සහ අන්තර් ක්‍රියාකාරී ලෙස භාණ්ඩ හා සේවා අලෙවි කිරීමයි.”
එහි ඉදිරිපත් වී ඇති තවත් නිර්වචනයකට අනුව,
” ඉලෙක්ට්‍රොනික් මාධ්‍ය එකක් හෝ කිහිපයක් හරහා නිෂ්පාදන හෝ වෙළඳ නාම ප්‍රවර්ධනය කිරීම ඩිජිටල් අලෙවිකරණය වේ.”
ඩිජිටල් අලෙවිකරණය තුළ සාම්ප්‍රදායික අලෙවිකරණයට සමාන බොහෝ මූලධර්ම ඇතුළත් වන අතර පාරිභෝගිකයන් වෙත ළඟා වීමට සහ ඔවුන්ගේ හැසිරීම් තේරුම් ගැනීමට හැකියාව පවතී.වර්ෂ 1990 පමණ වන විට අන්තර්ජාලය පුළුල් ලෙස භාවිත කිරීමත් සමඟ ඩිජිටල් අලෙවිකරණය ජනප්‍රිය වන්නට විය.ඩිජිටල් අලෙවිකරණය තුළ වෙබ් අඩවි, ජංගම උපාංග සහ සමාජ මාධ්‍ය වේදිකා වැනි නාලිකා හරහා නිෂ්පාදන සහ සේවා ප්‍රවර්ධනය කරනු ලබන අතර ඩිජිටල් අලෙවිකරුවන්ට ඔවුන්ගේ ව්‍යාපාරවල සඵලතාව මැනීම සඳහා මෙවලම් ගණනාවක් ඇත.
අලෙවිකරණය යනු විභව පාරිභෝගිකයන් වෙත තම නිෂ්පාදන හා සේවා ප්‍රවර්ධනය කිරීම සහ ඔවුන්ගේ නිෂ්පාදන වැඩිදියුණු කිරීම සඳහා තාක්ෂණික ක්‍රම සහ මාධ්‍ය භාවිත කිරීමයි.මින් පෙර පුවත්පත්, සඟරා, ගුවන් විදුලිය සහ රූපවාහිනිය වැනි නාලිකා තුළින් අලෙවිකරණය කිරීම කෙරෙහි අවධානය යොමු කළ අතර ඒ සියල්ල තවමත් පවතින නමුත් අන්තර්ජාලය යනු පාරිභෝගිකයන් වෙත ළඟා වීමේ පහසු මාධ්‍යයක් බැවින් ඩිජිටල් අලෙවිකරණය කෙරෙහි අවධානය යොමුව තිබේ.
මුල් කාලීන ඩිජිටල් අලෙවිකරණය තුළ විද්‍යුත් තැපෑල ජනප්‍රිය මෙවලමක් විය. නමුත් පසුව Netscape වැනි සෙවුම් යන්ත්‍ර කෙරෙහි අවධානය යොමු විය.මේ වන විට ෆේස්බුක් වැනි සමාජ මාධ්‍යවේදිකාවල දියුණුව නිසා පරිශීලක දත්ත නිරීක්ෂණය කිරීමටත් ලබා දිය යුතු පණිවිඩ නිශ්චිත ග්‍රාහක පිරිසක් වෙත ලබාදීමට ඩිජිටල් අලෙවිකරුවන්ට හැකියාව පවතී.
ජංගම දුරකථන වැනි පහසුවෙන් එහා මෙහා ගෙන යා හැකි උපාංග මේ වනවිට පවතින බැවින් ව්‍යාපාර වලට පාරිභෝගිකයන් කුමන ස්ථානයක සිටියත් පහසුවෙන් තම නිෂ්පාදන හා සේවා අලෙවි කිරීමට හැකි වේ.2022 වසරේ Pew පර්යේෂණ ආයතනය පෙන්වා දෙන පරිදි ඇමරිකානු වැඩිහිටියන්ගෙන් 76%ක් ඔවුන්ගේ දුරකථන ඔස්සේ මාර්ගගතව මිලදී ගැනීම් සිදුකරනු ලබයි.
ඩිජිටල් අලෙවිකරණ නාලිකා 1990 ගණන් වල සිට මේ දක්වා පරිණාමය වී ඇත.ඒ අනුව මේ වනවිට ජනප්‍රිය අලෙවිකරණ නාලිකා කිහිපයක් හඳුනාගත හැකිය.ඒ අතර,
1.වෙබ් අඩවි අලෙවිකරණය
✳️බොහෝ ව්‍යාපාර සහ සමාගම් තම භාණ්ඩ හා සේවා අලෙවි කිරීම උදෙසා තමන්ගේම වෙබ් අඩවියක් භාවිත කරනු ලබයි.
2.ක්ලික් කිරීමකට ගෙවන ප්‍රචාරණය (Pay-pre click advertising)
✳️මෙම වෙළඳ ප්‍රචාරණය මගින් ප්‍රවෘත්ති, වෙනත් වෙබ් අඩවි සහ ඩිජිටල් වේදිකාවල ගෙවන දැන්වීම් හරහා පාරිභෝගිකයන් වෙත ළඟා වීමට අලෙවිකරුවන්ට හැකිය.
මෙම ප්‍රචාරණයන්ට ඔවුන්ගේ ජනවිකාස ලක්ෂණ (වයස ස්ත්‍රී/ පුරුෂ බව) හෝ ඔවුන්ගේ විශේෂ අවශ්‍යතා සහ ස්ථානය පදනම්ව පරිශීලකයන් කොටස් කළ හැකිය.
උදා- Google දැන්වීම්
Facebook දැන්වීම්
Youtube දැන්වීම්
3.අන්තර්ගත අලෙවිකරණය
✳️අනාගත ගනුදෙනුකරුවන්ට ඔවුන් උනන්දුවක් දක්වන ලිඛිත, දෘෂ්‍ය හෝ වීඩියෝ අන්තර්ගතයන් භාවිත කරමින් ඔවුන් වෙත ළඟා වීම මෙහි පරමාර්ථයයි.
මෙය ප්‍රචාරණයට වඩා සියුම් වීමට උත්සාහ දරන අතර අලෙවිකරණය කරන භාණ්ඩය හෝ සේවාව කැපී පෙනෙන ලෙස ඉස්මතු කර දැක්වීමට හෝ නොවීමට වගබලා ගනී.
4.විද්‍යුත් තැපැල් අලෙවිකරණය
✳️විද්‍යුත් තැපැල් අලෙවිකරණය තවමත් වඩාත් ඵලදායී ඩිජිටල් අලෙවි කරන නාලිකාවලින් එකක් ලෙස හඳුනාගත හැකිය.
5.සමාජ මාධ්‍ය අලෙවිකරණය
✳️සමාජ මාධ්‍ය භාවිත කරමින් ව්‍යාපාරයක සන්නාම දැනුවත්භාවය ගොඩනැගීම සහ විශ්වාසය තහවුරු කිරීම මෙමගින් අදහස් වේ.මෙය සෘජු අලෙවි කරන හෝ විකුණුම් නාලිකාවක් ලෙස භාවිත කළ හැකිය.
6.අනුබද්ධ අලෙවිකරණය
✳️මෙය පැරණිතම අලෙවිකරණ ක්‍රමයක් වන අතර ඩිජිටල් අලෙවිකරණය තුළදී මෙයට නව ජීවයක් ලබාදී ඇත.මෙහිදී සමාගම් සහ තනි පුද්ගල බලපෑම් කරන්නන් වෙනත් සමාගමක නිෂ්පාදනය ප්‍රවර්ධනය කරන අතර විකුණුම් සිදු කරන සෑම අවස්ථාවකදීම කොමිස් මුදලක් ලබා ගනී.
නිදසුන්- Amazon
7.වීඩියෝ අලෙවිකරණය
✳️බොහෝ අන්තර්ජාල පරිහරණය කරන්නන් යමක් මිලදී ගැනීමට පෙර යමක් ඉගෙනීමට, සමාලෝචනය කිරීමට හෝ විවේක ගැනීමට You tube වැනි වේදිකා භාවිත කරයි.වීඩියෝ අලෙවිකරුවන්ට Facebook, Youtube, Instagram, Tiktok වැනි වේදිකා භාවිත කළ හැකිය.
8.කෙටි පණිවිඩ අලෙවිකරණය
✳️සමාගම් හෝ ව්‍යාපාර තම නවතම නිෂ්පාදනය සහ ප්‍රවර්ධන පිළිබඳ තොරතුරු යැවීමට විධිමත් කෙටි පණිවුඩ භාවිත කරනු ලබයි.ලාභ නොලබන සංවිධාන හෝ දේශපාලන අපේක්ෂකයන් තමන්ව ප්‍රවර්ධනය කර ගැනීම සහ පරිත්‍යාග ඉල්ලා සිටීම සඳහා කෙටි පණිවිඩ භාවිත කරනු ලබයි.
ඩිජිටල් නාලිකා වේගයෙන් ව්‍යාප්ත වන බැවින් ග්‍රාහකයා ඒ මත තබාගෙන ඒවා ඵලදායී ලෙස භාවිත කරන්නේ කෙසේද යන්න සොයා බැලීමත්,අලෙවිකරුවන්ට මෙම වේදිකා ග්‍රහණය කරගත හැකි අතිවිශාල දත්ත ප්‍රමාණය විශ්ලේෂණය කිරීම සහ ඵලදායි ලෙස භාවිත කිරීමත්,පාරිභෝගිකයන් වැඩි වශයෙන් ඩිජිටල් දැන්වීම් කෙරෙහි අවධානය යොමු කරන බැවින් ඔවුන්ගේ අවධානය ආකර්ෂණය ඇති කර ගැනීමට පවත්නා දුෂ්කරතාවයත් මෙම ඩිජිටල් අලෙවිකරණය සතු අභියෝගයන් ලෙස හඳුනාගත හැකිය.
