උපාලි කරුණාරත්න
විදේශ රටවල වෙසෙන ශ්රී ලාංකිකයන්ට සිය උප්පැන්න, විවාහ සහ මරණ සහතික ලබාගැනීමට හඳුන්වා දුන් e-BMD පද්ධතිය ඔස්සේ 2025 වසරේදී පුද්ගලයන් 8027 දෙනකු ඍජු ප්රතිලාභ හිමි කරගෙන තිබේ.
රජය විසින් ක්රියාවට නංවා ඇති පොදු සේවා ඩිජිටල්කරණය කිරීමේ වැඩපිළිවෙළ යටතේ මේ e-BMD පද්ධතිය හඳුන්වා දුන් අතර, මේ වන විට තානාපති කාර්යාල සහ මහකොමසාරිස් කාර්යාල 62ක මෙය සාර්ථකව ක්රියාත්මක වේ.
රාජ්ය සේවය ජනතාවට වඩාත් සමීප කරවීමේ රජයේ වැඩපිළිවෙළට අනුව ජනාධිපති ලේකම් කාර්යාලය සහ ඩිජිටල් ආර්ථික කටයුතු අමාත්යාංශයේ මෙහෙයවීමෙන් පසුගිය වසරේ (2025) ජනවාරි මස 06 වැනිදා රටවල් 07ක නියමු ව්යාපෘතියක් ලෙස e-BMD ව්යාපෘතිය හඳුන්වා දෙනු ලැබිණි. පසුව එය 2025 පෙබරවාරි මස 07 වැනිදා සිට විදෙස් තානාපති කාර්යාල සහ මහකොමසාරිස් කාර්යාල 62ක් දක්වා ව්යාප්ත කෙරිණි.
මෙමඟින් විදේශගත ශ්රී ලාංකිකයන්ට උප්පැන්න, විවාහ සහ මරණ සහතිකවල සහතික කළ පිටපත් තම රටට අදාළ තානාපති කාර්යාලය හෝ මහකොමසාරිස් කාර්යාලයෙන් ඍජුවම ලබා ගත හැකිය. නෛතික පිළිගැනීමකින් යුතුව මේ සහතික පත් නිකුත් කිරීම සිදු වන අතර, මේ සඳහා නැවත ලංකාවට පැමිණීම හෝ දීර්ඝ කාලීන ක්රියාවලියක නිරතවීම අවශ්ය නොවේ.
උප්පැන්න, විවාහ සහ මරණ සහතික නිකුත් කිරීමේ සේවා ඩිජිටල්කරණය කර තානාපති කාර්යාල සහ මහකොමසාරිස් කාර්යාල ඍජුවම රෙජිස්ට්රාර් ජනරාල් දෙපාර්තමේන්තුව හා සම්බන්ධ කිරීමෙන් ලේඛනවල විශ්වසනීයත්වය සහ ආරක්ෂාව තහවුරු කරමින් ලේඛන සැකසීමේ කාලය විශාල වශයෙන් අඩු කර තිබේ. රෙජිස්ට්රාර් ජනරාල් දෙපාර්තමේන්තුවේ තොරතුරු හා සන්නිවේදන තාක්ෂණ අංශයෙන් දෙන තත්ය කාලීන (Real-time) තාක්ෂණික සහාය හේතුවෙන් තානාපති කාර්යාල සහ මහකොමසාරිස් කාර්යාලවල මෙහෙයුම් ගැටලු විසඳමින් බාධාවකින් තොරව මේ සේවාව පවත්වාගෙන යෑමට මේ වන විට හැකියාව ලැබී ඇත.
එක්සත් රාජධානිය, ඉතාලිය, ඔස්ට්රේලියාව, කැනඩාව, අමෙරිකා එක්සත් ජනපදය, ප්රංශය, ජර්මනිය, එක්සත් අරාබි එමීර් රාජ්ය, ජපානය, මැලේසියාව, ඉන්දියාව ඇතුළු යුරෝපය, මැදපෙරදිග සහ ආසියානු කලාප රැසක වෙසෙන ශ්රී ලාංකිකයන්ට මේ සේවාව ක්රියාත්මක වේ.
රැකියා, අධ්යාපන සහ ආගමන විගමන කටයුතු සඳහා අවශ්ය වන සහතික පත් ගැනීමේදී විදේශගත ශ්රී ලාංකිකයන්ට මේ වැඩපිළිවෙළ විශාල සහනයක් වී තිබේ.
උපුටා ගැනීම : දිනමිණ
